Bi uns leersch nid numme drummle und pfyffe, sondern au Fasnacht mache

D' Pfluderi Clique isch 1929 vo Mitglieder vom Veloclub Olympia im Restaurant Schnabel gründet worde. Syt den hän mir uns zunere mittelgrosse gmischte Stammglygge gmuuseret, wo immer no im Restaurant Schnabel deheim isch und am Noodlebärg 18 dr Glyggekäller het. Mir sinn im Härz vo dr Innerstadt dehai!

Im Joor 1946 het me denne die Jungi Garde uss dr Daufi ghobe. Für die ältere Semeschter isch im Joor 1963 unseri Alti Garde gründet worde.

Iebigsstunde

Willkomme sin Kinder ab dr erschte Schuelklass. Unseri Iebigsstunde finde jewils am Mittwuch z’Obe zwüsche 18:00 und 20:00 Uhr in dr Basler Altstadt (Petersschuelhuus und Restaurant Schnabel) statt.

Du möchtsch kei Instrumänt leere, aber gärn Fasnacht in ere Clique mache? Au denn bisch bi uns willkomme. Denn näbscht de Iebigesstunde stoht vor allem s'zämme si im Vordergrund. Sigs bim Summerplausch, em Mässbummel, amne Weekend oder gar imne Herbschtlager.

Unser Cliquejoor

• Zwüsche em 2. Bummelsunntig (wo die Junge Pfluderi dr Bummel hän) und de Osterferie starte d'Afänger mit de Iebigsstunde. Die rästliche Gruppe starte nach de Osterferie
• Dr letscht Mittwuch vo der Summerferie verbringe mir als Jungi Garde zämme bim Glacé ässe und ere Wasserschlacht
• Nach de Summerferie starte mir mit dr Sujetsitzig - alli Junge Pfluderi sin iiglade, zämme s'Sujet für die neggschti Fasnacht z'erarbeite
• Vor de Herbstferie wird Mass gnoh, drmit unseri Schniiderinne s Gostüm könne neihe
• Nach de Herbstferie starte mir denn mit em Larve gaschiere - alli Junge Pfluderi gaschiere ihr Larve unter Aleitig sälber
• Immer am 2. Mittuwch vo dr Herbstmäss gön die Junge zämme uff e Mässbummel
• Ab em Novämber wärde d Larve fertiggstellt und aapasst
• Dr letscht Mittwuch vor de Wiehnachtsferie verbringe alli Junge Pfluderi zämme
• Im Januar findet s Baslerstäbli statt, dr Alass für die ganzi Pfluderi-Familie

Iebigswucheänd oder Herbschtlaager

Mir wäxle ab zwüsche Iebigswucheänd und Herbschtlaager. S'Iebigswucheänd findet jewils vo Fritig bis Sunntig statt, s Herbschtlaager isch jewils in dr erschte Herbschtferiewuche plant. S Herbstlaager probiere mir all paar Joor z'organisiere - s neggschte Herbstlaager isch fürs 2027 plant.

Fasnacht

An dr Fasnacht laufe mir immer vor em Restaurant Schnabel, em Stammlokal vo dr Pfluderi Clique, ab. Dört wingge mr au immer wider ab. Am Morgestraich und am Mittwuchobe simr teilwiis mit em Stamm und dr Alte Garde unterwäggs. Dr Zyschtigoobe isch bi uns obligatorisch, denn isch me zämme mit dr ganze Junge Garde am gässle.